Незаўважна, ціхімі крокамі набліжаецца адна з самых шчаслівых і ў той жа час самых трагічных дат сусветнай гісторыі. Дзень Перамогі! У гэтай сувязі ўзнікае шмат пытанняў:
Ці трэба гаварыць з дзецьмі пра вайну?
Як размаўляць з імі пра гэтыя жахлівыя часы?
Што ведаюць сучасныя дзеці і падлеткі пра вайну?
Ці здольны яны зразумець боль і жах тых часоў?
Хто можа праўдзіва і пранікнённа расказаць дзецям пра вайну?
Канешне ж, самі дзеці. Дзеці вайны!
Дзеці, якія страцілі сваё дзяцінства.
Дзеці, якія пасталелі ў адно імгненне.
Дзеці, якія былі шчаслівыя скарыначцы хлеба.
Але ж усё такі дзеці…
Іх гісторыя – гэта балючыя ўспаміны, невыплаканыя слёзы, невыказаныя словы. Іх цяжка слухаць, але яшчэ цяжэй іх расказаць.
Упершыню з расказамі-ўспамінамі чытачы маглі пазнаёміцца на старонках часопіса “Вясёлка”. Дзеці вайны праўдзіва расказвалі пра сваё маленства і юнацтва, апаленае вайною, дзецям сучасным.
Гісторый сабралася так многа, і ўсе яны былі настолькі блізкія і адначасова асабістыя, што ўтварылася эпапея жыцця і сталення цэлага пакалення людзей. Усе аповяды былі сабраны ў адну кнігу пад назвай “Я помню ўсё…” У прадмове да кнігі ветэран Вялікай Айчыннай вайны, паэт, лаўрэат Літаратурнай прэміі імя Аркадзя Куляшова, Пятро Прыходзька так ахарактарызаваў гэта пакаленне дзяцей: “птахі з апаленымі, але моцнымі і мужнымі крыламі, якія ў свой час набіралі ўзлёт і дасягнулі сваіх вышыняў у жыцці і ў літаратуры”. Лейтматывам кнігі сталі словы ўкладальніка зборніка Уладзіміра Сцяпанавіча Ліпскага: “Хочацца, каб нашы дзеці ніколі не плакалі па спаленых, знішчаных цацках, каб ніколі не забывалі трагедый мінулых і не дапускалі новых”. Так у 2016 годзе ў выдавецтве “Адукацыя і выхаванне” ў серыі «Бібліятэка часопіса “Вясёлка”» з’явілася сур’ёзная і шчымлівая кніга для дзяцей “Я помню ўсё…” Чытайце дзецям карысныя кнігі! Яны павінны ганарыцца сваімі продкамі і сваёй краінай.
#гісторыяаднойкнігі #историяоднойкниги #великая_Победа75 #центральнаядетскаябиблиотекаостровского_минск #цэнтральнаядзіцячаябібліятэкаастроўскага_мінск #цсдб_минск #книгиовойне #вов #кнігінабеларускаймове
Комментариев нет:
Отправить комментарий