Служэнне роднаму слову

"Служэнне роднаму слову: Якуб Колас і Янка Купала" - пад такой назвай 26 лістапада Цэнтральная гарадская дзіцячая бібліятэка сумесна з настаўніцай беларускай мовы і літаратуры Савіцкай Рамуальдай Адамаўнай  ладзілі  літаратурна-музычную кампазіцыю, прысвечаную 130-годдзю з дня нараджэння Янкі Купалы і Якуба Коласа. Удзельнікі - вучні СШ № 67.
Прапануем фотаздымкі актыўных чытальнікаў,  якія з любоўю і гонарам дэкламавалі вершы Янкі Купалы і Якуба Коласа. Свята пачалося з  інсцэніроўкі верша "А хто там ідзе?", потым гучала песня "Спадчына" на словы Янкі Купалы.  Вядучыя з гонарам чыталі  такія радкі:
"Чытаць вершы Купалы і Коласа -
 Найвялікшае свята.
Хай яно урачыста і молада
Ўвойдзе ў кожную хату.
Хай для ўсіх загучыць па-новаму,
Узнясецца высока
Беларускае слова кроўнае
Нашых слынных прарокаў."
З пашанай прыгадалі некаторыя радкі біяграфій Янкі Купалы і Якуба Коласа. Гучалі вершы Янкі Купалы "На купалле", "Жняя", "Мужык", "Роднае слова", а таксама вершы Якуба Коласа "Родныя вобразы", "Маці", "Пастушок", "На лузе", "Раніца вясною" і іншыя. З вялікай цікавасцю ўсе прысутныя глядзелі інсцэніроўку верша Янкі Купалы "Сын і маці" і верша Якуба Коласа "Храбры певень ".
Я упэўнена, што ўдзельнікі гэтай імпрэзы ў час чытання  вершаў зразумелі і адчулі стан душы - быць беларусам. Гэтым прыгожым дэкламанаваннем вершаў яны падзяліліся са  слухачамі сваёй  любоўю да роднай мовы. Напрыканцы свята ў выкананні Сяргея Марголіна гучалі радкі верша Янкі Купалы "Ворагам беларушчыны", на вялікі жаль, актуальныя і сёння.
Спадзяюся, што  гэтыя цудоўныя хвіліны паэзіі  абудзілі ў сэрцах слухачоў  ўвагу да паэзіі, літаратуры.
Дуброўская Людміла.