Які ў вас сёння настрой?

Госці сустрэчы  -  літаратарка, паэт Валерыя Кустава (таксама вядомая як Валярына) і   малады драматург Васіль Дранько-Майсюк.

– Які ў вас сёння настрой? У школе падабаецца,  найбольш якія урокі? - адразу спытаў Васіль.

Адказы:

- кепскі, добры.

- падабаецца фізкультура, яда ў буфеце, канікулы.

– Тады слухайце мяне, зараз абыграем гэты момант: “Я захожу , вітаюся з вамі, а вы мне паказвайце свой настрой; ціхенька  кажам  і паказваем “кепскі”, а потым мацней “добры”.

Настрой у вас палепшыўся і я раскажу трохі пра сябе. Я пішу п’есы. Хто быў у тэатры імя Максіма Горкага? 19 верасня раю схадзіць у тэатр на спектакль “Пясняр”. Героі п’есы – Пясняр (Уладзімір Мулявін), Янка Купала, Якуб Колас, Максім Багдановіч, Цётка.

Уладзімір Мулявін зрабіў рэвалюцыю ў музыцы. Вядома, што калі Джордж Харысан, удзельнік славутага рок-гурта  “Битлз”,  пачуў песні “Песняроў” сказаў: - “Мулявін – гэта вялікі музыкант”.

Пытанне: “ Якіх беларускіх пісьменнікаў вы ведаеце?”

Адказы: “ Якуб Колас, Янка Купала, Максім Танк, Максім Багдановіч,  Максім Горкі.

Так, дарэчы наконт Горкага. Успомнім Цэнтральны дзіцячы парк, там стаіць помнік Горкаму з 1910 года. Чаму? Тут трэба ўспомніць гісторыю. 1910 год – Расійская імперыя вакол. Максім Горкі быў самы папулярны, уплывовы і багаты пісьменнік. Максім Горкі,  азнаёміўшыся з  вершамі  Коласа і Купалы, напісаў, што «У Беларусі ёсць два паэты: Якуб Колас і Янка Купала — вельмі цікавыя хлопцы! “.  Горкі  пераклаў на рускую мову верш Янкі Купалы “А хто там ідзе? ”.

Сёння сказалі б, што  Максім Горкі зрабіў добрую рэкламу беларускім паэтам.

– А што вы ведаеце пра Коласа? Ён жа да 70-ці  год калоў дровы, фізічна быў моцным чалавекам. І адзін з самых рамантычных паэтаў. Якуб Колас быў вельмі ўлюбчывым.  Напрыклад, у 1905 годзе ён быў закаханы ў  прыгожую дзяўчыну, тады ж яго за палітычныя погляды пасадзілі ў турму. Праз 2 дні да яго ў турму прыходзіць дзяўчына і кажа, што яна знайшла другога.  Яму толькі 27 год, такое расчараванне. Менавіта тады пачаў пісаць “Новую зямлю”. Гэта яго спасло, дзяўчына можа здрадзіць, а родная хата ніколі.

Давайце ўспомнім першыя радкі паэмы “Новая зямля”:

Мой родны кут, як ты мне мілы!..

Забыць цябе не маю сілы!

Не раз, утомлены дарогай,

Жыццём вясны мае убогай,

К табе я ў думках залятаю

І там душою спачываю.  

 Адчуйце рытміку верша. Чалавек ходзіць туды-сюды па камеры  і нараджаюцца радкі :“Мой родны кут …”.  Праца над паэмай спасла жыццё Якубу Коласу.

Дзе стаіць помнік Якубу Коласу? Хто аўтар?

Аўтар - скульптар Заір Азгур. Ён напісаў цудоўную кніжку пра беларускіх пісьменнікаў «Незабыўнае». Невялікая  па зместу кніжачка, раю прачытаць вам і будзеце добра ведаць беларускую літаратуру.

А калі быў у эвакуацыі ў Ташкенце пісаў шмат вершаў, прысвечаных перакладчыцы Святлане Сомавай.

Раю вучыць беларускія вершы, будзе добрая памяць.

Давайце разам скажам:

“Мы любім беларускую літаратуру, мы самыя крутыя васьмікласнікі, мы прыедзем дадому і даведаемся, а якімі ж радкамі заканчваецца паэма “Новая зямля”.

Валерыя Кустава:

-  Ці пішаце вы вершы?  Напрыклад радкі: “Я цябе люблю, я цябе кахаю”. Чуеце розніцу? Любіць можна маму, тату, літаратуру, а кахаць толькі любімага.

Сёння мы правядзём невялічкую віктарыну. Калі мне было 16 гадоў, Таварыства беларускай мовы праводзіла конкурс “Што можна рабіць па-беларуску?”. Я прапанавала варыянт: “Кахаць па-беларуску”. Як жа можна кахаць па-беларуску? Гэта значыць прызнавацца ў каханні па-беларуску і тут вельмі дапамагаюць вершы:  прызнавацца ў каханні вершамі беларускіх паэтаў. У мяне нават такі верш нарадзіўся «Каханне-дранік»:

Ня веру ў моркву-каханне,

веру ў каханне-дранік,
веру ў каханне-бульбу,
веру ў бульбоўнік кахання!

Веру ў каханне-паўстанне,
веру ў каханне-выгнанне,
веру ў каханне-дыханне.
Веру
ў каханне!

Вашы варыянты: «Што можна рабіць па-беларуску?»

Адказы:

– Размаўляць па-беларуску, святкаваць па-беларуску, жыць па-беларуску, капаць бульбу па-беларуску, чытаць вершы па-беларуску.

– А ці ёсць сярод вас хлопчык па імені Саша? Адзін, два, тры. А па-беларуску ваша імя  - Алесь.

Можа хто ўспомніць верш на беларускай мове?

Самая смелая Даша  (вучаніца 8 класа СШ № 155) чытае верш Рыгора Барадуліна “Бацьку”:

 Не выйшаў ты і ў гэты раз

 Мяне спаткаць, паднесці рэчы...

 Ля весніц, толькі зноў твой вяз

 Крануў галінкамі за плечы.

Яшчэ адзін конкурс: “Задайце пытанне і мы вызначым лепшае”.

Пытанняў было шмат: раскажыце пра сваё дзяцінства, якую п’есу першай напісаў Васіль, якія адзнакі атрымлівалі ў школе, у колькі гадоў прыйшло першае каханне, з чым вы ясце дранікі, колькі вам гадоў, да якога ўзросту вы будзеце пісаць  п’есы, які верш падабаецца на беларускай мове, колькі вершаў ведаеце на памяць, ці чыталі вы цалкам раман “Вайну і мір”, вашы любімыя паэты і пісьменнікі і вас мухі бесяць?

На ўсе пытанні  былі дадзены адказы, а  на пытанне “Вас мухі бесяць?” Валярына ўзгадала верш Ларысы Геніюш  “Верабей”.

Верабейка:
– Ціў-ціў-ціў! –
Муху дзюбаю злавіў.
А таму, што быў ён добры,
То з сябрамі падзяліў.

Елі муху ўсе са смакам.
Шчабяталі:
– Дзякуй!
– Дзякуй!

На просьбу пачытаць верш на польскай мове, Валярына прадэкламавала верш Адама Міцкевича «Літва, о айчына мая!». Васіль Дранько-Майсюк нагадаў свой любімы верш Пятра Глебкі “Ты падбірала лён і пела …”

Даша і тыя, хто задаваў цікавыя  пытанні, атрымалі ад Валярыны падарункі.

Вельмі годна і  нязмушана гаварылі нашы госці пра  беларускую літаратуру, пра сваю працу, чыталі любімыя вершы.

Дзякуй вялікі, Васіль і Валярына , за сустрэчу.

Больш фота глядзі тут