Сустрэча з Уладзем Лянкевічам

У час вясновых канікул 27 сакавіка ў Цэнтральнай дзіцячай бібліятэцы г. Мінска ім. М. Астроўскага прайшла сустрэча з маладым літаратарам Уладзем Лянкевічам. На сустрэчу прыйшлі вучні мінскіх школ №№145 і 206.

Уладзь Лянкевіч прадставіў да ўвагі школьнікаў кнігу Джэймса Мэцью Бары “Пітэр Пэн” у сваім перакладзе з англійскай мовы на беларускую.

Дзеці добра ведалі сюжэт гэтай казачнай аповесці і актыўна адказвалі на пытанні спадара Уладзя. Не пакінулі абыякавымі школьнікаў ілюстрацыі да кнігі мастачкі Кацярыны Дубовік.

Уладзь Лянкевіч, несумненна, адзін з самых перспектыўных аўтараў свайго пакалення, які адначасна працуе ў некалькіх відах мастацтва і розных літаратурных жанрах.

Некаторыя з вершаў Уладзя пазначаныя не традыцыйнымі "зорачкамі", а нотным знакам: гэтыя тэксты сталіся песнямі, якія ўваходзяць у рэпертуар арт-рок і псіхадэлік гурта TonqiXod [ТонкіХод], дзе Уладзь Лянкевіч з'яўляецца вакалістам і гітарыстам.

Пасля Уладзь Лянкевіч крыху расказаў пра свой музычны гурт, а таксама адказаў на пытанні дзяцей.

У канцы сустрэчы Уладзь Лянкевіч заахвоціў школьнікаў вывучаць беларускую мову і расказаў, якія плюсы дае беларусу валоданне роднай мовай.

Жадаем творчых поспехаў Уладзю Лянкевічу і чакаем новых сустрэч!

Активная ссылка на все фотографии