Ура дзіцячай кнізе! 

Тыдзень літаратуры краін Паўночнай Еўропы (першапачаткова Тыдзень бібліятэк краін Паўночнай Еўропы) ужо больш за 20 гадоў з'яўляецца культурным праектам, накіраваным на распаўсюджванне любові да чытання, літаратуры і скандынаўскай традыцыі апавядання, якая не ведае межаў.

14 лістапада ў Цэнтральнай дзіцячай бібліятэцы імя М. Астроўскага ў рамках Тыдня літаратур Паўночных краін адбылося адкрыццё выставы Шведскай акадэміі дзіцячай кнігі “Ура дзіцячай кнізе! 17 прычын чытаць дзіцячыя кнігі”. Выстава арганізавана пры падтрымцы Пасольства Швецыі ў Беларусі і Шведскага інстытута.

 “…Сёння мы ведаем, что чытанне развівае мозг. Яно выводзіць нас на новы ўзровень абстрактнага мыслення. Будучыня патрабуе ад нашых дзетак здольнасці вырашаць праблемы і канфлікты, думаць па-новаму і разумець іншых людзей ды іншыя культуры...”

Менавіта такімі словамі чытачоў бібліятэкі сустракае выстава, на якой прадстаўлены 17 ілюстрацый з кніг пісьменнікаў Паўночных краін. Кожная з карцін не пакідае абыякавым гледача, а прымушае задумацца, здзівіцца, усміхнуцца…

 Вось 17 прычын чытаць дзіцячыя кнігі:

–                   Кніга дапамагае нам развіваць мову.

–                   Кніга – частка нашай культурнай спадчыны. Яна дае нам агульны досвед і веды.

–                   Кніга прымушае нас задумацца над тым, што правільна, а што не, што добра, а што кепска.

–                   Кніга дапамагае нам зразумець, што мы ўсе вельмі падобныя і, разам з тым, вельмі розныя.

–                   Кніга задае нам новыя пытанні, якія прымушаюць нас разважаць.

–                   Кніга дапамагае нам фармуляваць думкі, пашырае межы свядомасці і ўласны свет.

–                   Кніга абуджае фантазію і дапамагае нам развіваць вобразнае мысленне.

–                   Кніга дазваляе нам быць кімсьці іншым, развівае нашую здольнасць да спагады і эмпатыі.

–                   Кніга паказвае нам, што амаль на ўсё можна глядзець з розных бакоў.

–                   Кніга прымушае нас смяяцца і плакаць, суцяшае нас ды адкрывае нам новыя далягляды.

–                   Кніга заўсёды побач з намі, калі нам самотна.

–                   Кніга дапамагае нам лепш зразумець сябе, калі мы чытаем пра кагосьці, хто думае і адчувае так, як і мы.

–                   Кніга дае нам веды пра прыроду, тэхніку і гісторыю, пра іншыя краіны ды розныя лады жыцця.

–                   Кніга тлумачыць нам, як уладкаваны сусвет, і дапамагае зразумець, як рэчы звязаныя паміж сабой.

–                   Чытанне кнігі ўголас – гэта сустрэча дзяцей з дарослымі.

–                   Дзіцячая кніга дазваляе сустрэцца з рознымі формамі мастацтва – ілюстрацыяй, фатаграфіяй, паэзіяй, драмай.

–                   Дзіцячая кніга – гэта першая сустрэча з літаратурай – бязмежным сусветам, які застаецца з намі на працягу ўсяго жыцця.

Сардэчна запрашаем чытачоў і гасцей бібліятэкі на выставу падчас Тыдня літаратур Паўночных краін, 12-18 лістапада 2018 года, у Цэнтральную дзіцячую бібліятэку, каб знайсці сваю прычыну больш чытаць кнігі і атрымаць вялікае задавальненне ад простых, але такіх шчырых карцін!

  

 Актыўная спасылка на ўсе фотаздымкі