Адбылася сустрэча  з вучнямі 6-х і 9-х  класаў СШ № 67, прысвечаная беларускаму першадрукару Францыску Скарыне. Бібліятэкары   прэзентавалі трохтамовае энцыклапедычнае выданне “Францыск Скарына” (аўтар - намеснік дырэктара Нацыянальнай бібліятэкі, кандыдат культуралогіі Алесь Суша).

Францыска Скарыну называюць самым вядомым беларусам. Ён быў першым, хто выдаў кнігу псалмоў на роднай беларускай мове. І сёння  Францыск Скарына - добры прыклад для вучняў:

• Скарына спадзяваўся толькі на свой розум і здольнасці, не маючы багатай бацькоўскай спадчыны,
• заняўся новай, рызыкоўнай справай – кнігадрукаваннем,
• не баяўся мяняць месца працы і пражывання.

А які Францыск Скарына быў  патрыёт! Слаўны палачанін у кожнай са сваіх кніг абавязкова пазначаў, што кніга выкладзена доктарам Францыскам Скарынам са слаўнага горада Полацка.

Духоўны запавет Скарыны да нас змешчаны ў прадмове да кнігі “Юдзіф” :

   Як звяры, што блукаюць у пушчы, ад нараджэння ведаюць сховы свае,

   Як птушкі, што лётаюць у паветры, помняць гнёзды свае,

   Як рыбы, што плаваюць у моры і ў рэках, чуюць віры свае

    і як пчолы бароняць вуллі свае – гэтак і людзі да месца,

   дзе нарадзіліся і ўзгадаваны ў Бозе, вялікую ласку маюць.

(паэтычны пераклад Алеся Разанава). 

Аб гэтым гаварылі вучням на сустрэчы і раілі запомніць дату - 6 жніўня 1517 года – дзень нараджэння беларускага кнігадруку.