З Днём Незалежнасці Рэспублікі Беларусь!

Віншуем Вас з Днём Незалежнасці Рэспублікі Беларусь і 75-й гадавінай вызвалення Беларусі і горада Мінска ад нямецка-фашысцкіх захопнікаў!

“Усё, што вы хацелі ведаць пра Магілёўшчыну”

25 красавіка ў Цэнтральнай дзіцячай бібліятэцы ім. М. Астроўскага чытачам было прапанавана прыняць удзел у новай экспрэс-віктарыне з цыкла “Нашае, роднае, любае…” пад назвай “Усё, што вы хацелі ведаць пра Магілёўшчыну”. Нашы чытачы выцягвалі са скрыначкі па дзве паперкі з пытаннямі, якія былі прысвечаны гісторыі і сучаснасці Магілёва і Магілёўскай вобласці. Апытанне чытачоў паказала, што ў бібліятэку ходзяць адукаваныя людзі, якія добра ведаюць гістарычныя даты, падзеі, выдатныя мясціны, назвы старажытных гарадоў і імёны славутых дзеячоў Магілёўшчыны. Усе, хто правільна адказваў на пытанні, атрымліваў падарункі.

Пры падтрымцы Інстытута ім. Гётэ ў Мінску.

Запрашаем чытачоў 25 мая паўдзельнічаць у экспрэс-віктарыне “Усё, што вы хацелі ведаць пра Гродзеншчыну”.

 Спасылка на ўсе фотаздымкі

Прэзентацыя беларускага выдання кнігі «Пакатун і Паляжун. Гісторыі з жыцця»

22 красавіка а 13.00 у Цэнтральнай дзіцячай бібліятэцы імя М.Астроўскага адбудзецца прэзентацыя беларускага выдання кнігі «Пакатун і Паляжун. Гісторыі з жыцця» вядомай швейцарскай пісьменніцы і спявачкі, пераможцы шматлікіх літаратурных прэмій Брыгіты Шэр. Яе імя ўключана ў ганаровы спіс Міжнароднай рады па дзіцячай і юнацкай літаратуры ЮНЕСКА. 
Госці сустрэчы змогуць пачуць гісторыі пра кранальнае, а часам і складанае сяброўства Пакатуна і Палежуна па-нямецку ў выкананні аўтаркі і па-беларуску ў выкананні Алеся Малчанава.У імпрэзе прыме удзел і перакладчыца кнігі. 
Вы зможаце даведацца, як былі створаныя персанажы па-нямецку і па-беларуску, абмеркаваць з аўтаркай і перакладчыцай гэтыя гісторыі, кожная з якіх раскрывае станы, эмоцыі і сітуацыі, знаёмыя нам усім. 
Пры падтрымцы інстытута імя Гётэ у Мінску.

Сандзень

“Усё, што вы хацелі ведаць пра Гомельшчыну”

19 сакавіка ў Цэнтральнай дзіцячай бібліятэцы ім. М. Астроўскага чытачам было прапанавана прыняць удзел у новай экспрэс-віктарыне з цыкла “Нашае, роднае, любае…” пад назвай “Усё, што вы хацелі ведаць пра Гомельшчыну”.

 Нашы чытачы выцягвалі са скрыначкі па дзве паперкі з пытаннямі, якія былі прысвечаны гісторыі і сучаснасці Гомеля і Гомельскай вобласці. Сярод удзельнікаў віктарыны былі былы дырэктар мінскай гімназіі №10 Кабаковіч Алена Іосіфаўна і настаўніца сярэдняй школы №67 Таратын Наталля Анатольеўна. Апытанне чытачоў паказала, што ў бібліятэку ходзяць адукаваныя людзі, якія добра ведаюць гістарычныя даты, падзеі, назвы старажытных гарадоў і імёны славутых дзеячоў Гомельшчыны. 

У віктарыне прынялі ўдзел і некаторыя супрацоўнікі бібліятэкі. Усе, хто правільна адказваў на пытанні, атрымліваў салодкі падарунак.

Запрашаем чытачоў 25 красавіка паўдзельнічаць у экспрэс-віктарыне “Усё, што вы хацелі ведаць пра Магілёўшчыну”.

Спасылка на ўсе фотаздымкі

“Людзей слухай, а свой розум май”

20 лютага ў Цэнтральнай дзіцячай бібліятэцы імя М.Астроўскага прайшло гучнае чытанне беларускіх народных казак пад назвай “Людзей слухай, а свой розум май”. Сустрэча адбылася  напярэдадні Міжнароднага дня роднай мовы (21.02).

Казкі прысутнічаюць у жыцці кожнага чалавека з дзяцінства. Казка ­– гэта не проста забава. У ёй хаваюцца назапашаныя стагоддзямі і пакаленнямі веды. Гэта пасланне нашчадкам пра тое, як жыць, любіць, сябраваць, дзейнічаць у складаных сітуацыях, як будаваць сям’ю, адносіны паміж мужчынам і жанчынай, паміж бацькамі і дзецьмі. У той момант, калі дзіця слухае казку, у глыбіні яго душы адбываюцца пераўтварэнні. Казка не проста настаўнік, яна добры лекар, які дапаможа перажыць гора, смутак, трывогу.

У цудоўных казках нашага народа – жыццёвая мудрасць і духоўныя каштоўнасці, уласцівыя менавіта беларускім людзям. Беларускія казкі павучаюць, падказваюць, перасцерагаюць, развіваюць увагу, памяць, мысленне. Іх карысна ўводзіць у жыццё дзіцяці ў любы час.

На сустрэчы з вучнямі мінскай школы №67 мы засяродзілі ўвагу менавіта на казкі пра жывёл – сапраўднае багацце беларускага фальклору, дзе кожны персанаж мае характар чалавека. Хлопчыкі і дзяўчынкі адразу зразумелі, хто добры, а хто злы і хітры. Для чытання і абмеркавання наўмысна ўзялі кароткія, з простым сюжэтам, невялікай колькасцю персанажаў, дзе выразна супрацьпастаўляюцца дабро і зло. Чытанне трох казак суправаджалася тэатральнымі элементамі і гульнёй з цацкамі. Казачная віктарына праверыла памяць школьнікаў. Падарункі атрымалі самыя ўважлівыя.

Казка – адзін з тых колераў вясёлкі, які робіць дзіцячы свет больш цёплым і сардэчным. Чытайце беларускія народныя казкі! 

Са святам роднай мовы!

 

Спасылка на ўсе фотаздымкі