19 снежня, у
чарговы беларускі чацвер, да нас у госці завітала Ганна Янкута – вядомая шырокай
беларускай супольнасці перакладчыца кніг для дзяцей і дарослых з англійскай і
польскай моў, літаратурны крытык і дзіцячая пісьменніца. Дзякуючы ёй
па-беларуску з’явіліся на свет гісторыі пра Шэрлака Холмса і шмат чаго яшчэ. У мінулым годзе пабачыла свет першая аўтарская кніга
Ганны Янкута «Кот Шпрот і таямніца атракцыёнаў».
Нашы маленькія чытачы, вучні
мінскай школы №67 http://sch67.minsk.edu.by/, пазнаёміліся з цікавай кнігай пра
сімпатычнага інтэлегентнага ката, які
вандруе па Мінску, і здзейснілі падарожжа
па сталіцы.
Справа ў тым, што дзеянне адбываецца
ў сапраўдных мінскіх мясцінах: завулак Калініна, бульвар Талбухіна, Парк
Чалюскінцаў. Ганна Валер’еўна распавяла хлопчыкам і дзяўчынкам пра тое, што паводле
сюжэту кот Шпрот (дарэчы, з катом Ганна Валер’еўна
знаёма асабіста) любіць уначы цішком збегчы з балкона і паблукаць па ваколіцах.
Шпрот разам з хлопчыкам Алесем і прывідамі расследуе містычна-дэтэктыўную
гісторыю знікнення мышэй у парку. “Кот Шпрот і таямніца атракцыёнаў” – толькі
першая кніга з серыі пра незвычайнага ката і яго сяброў. Чытачоў чакае працяг.
Шмат добрых слоў
пісьменніца сказала пра мастачку-ілюстратарку Лілію Давыдоўскую. Замалёўкі з
завулка Калініна і Парку Чалюскінцаў можна паглядзець у кнізе пра ката Шпрота. Усяго
ў казцы амаль 50 малюнкаў. Для лепшай арыентацыі па вуліцах горада мастачка намалявала карту.
Сустрэча атрымалася
вясёлай і насычанай: чытанне ўслых урыўка з кнігі, гульня ў перакладчыкаў і
забаўка “веру-не веру”. Спадарыня Ганна раскрыла ўсе сакрэты стварэння кнігі і адказала
амаль на сто пытанняў дзяцей. У сваю
чаргу, у вялікім захапленні ад сустрэчы, чытачы падаравалі пісьменніцы свае
малюнкі: як яны прадстаўляюць сабе незвычайнага ката Шпрота і самі атрымалі
падарункі ад аўтаркі.
Імгненна праляцела
гадзіна. Будзем з нецярпеннем чакаць працяг гісторый пра незвычайнага ката і яго
сяброў і новую сустрэчу з таленавітай казачніцай Ганнай Янкута!
Комментариев нет:
Отправить комментарий